كتبت | سارة خليل
مبروك الأجازة لكل طلاب الثانوية العامة ، كلنا شاهدين كانت أيام صعبة خاصة في ظل الظروف والأزمة اللي بنمر بيها والحمدلله عدت بسلام .
الكل مستني النتيجة ، قلقان ، خايف ، لازم تعرف انك لحاد هنا انت كدا عملت اللي عليك، ملكش دعوة بالباقي.
متخليش القلق والخوف من النتيجة ينسوك فرحة الأجازة اللي كان نفسك فيها من زمان، وفرحة انك خلاص اتحررت من يونيفورم وشنطة المدرسة ، وهتبدأ مرحلة جديدة ، وبداية طريق حياتك العملية ، وهيبدأ اعتمادك على نفسك يزيد ، والانفتاح لخطوة وعالم جديد.
علشان كدا حاول بقدر الامكان تستغل الفترة دي وتستعد صح للفترة الجاية.
ازاي تستعد للجامعة والنتيجة صح
صحتك الجسدية
-اكيد نومك كان ملغبط بسبب توتر وليالي الامتحانات ، ارجع نام كويس وارتاح ، نام سبع او تمن ساعات ، وحاول تختار وقت ثابت تنام فيه وتصحى فيه .
-منكم اللي نقص وزنه ومنكم اللي وزنه زاد ، متقلقش وابدأ اهتم بالأكل الصح علشان جسمك يرجع احسن من الأول ، ابدأ نظم 3 وجبات رئيسية في اليوم ووجبتين سناك خفيف بينهم ، واهتم انهم يبقو شاملين معظم العناصر الغذائية المفيدة لجسمك ولعقلك.
-قلل المنبهات بقدر الأمكان .
-ابدأ اهتم بالرياضة ، انت تستحق جسم صحي ،حاول تعمل رياضة خفيفة يوميا زي المشي نص ساعة أو اجري في مكانك ربع ساعه ، اعمل اي نشاط تحرك فيه جسمك.
-مارس هواياتك اللي بتحبها ، واشغل وقتك متخليش وقت يخليك تقلق من التفكير في النتجة .
الاستعداد للجامعة
استغل الوقت دا في القراءة عن تخصصات الجامعات المختلفة ، ابدأ اكتشف نفسك بتحب اي وبيشدك مجال اي أكتر ، حاول متحطش في بالك اللي يقولك كليات قمة وكليات قاع ، ومتزعلش من كلام الناس فمحاسب شاطر احسن من دكتور فاشل ، اختار المجال اللي يشدك واللي هتستحمل أي عقبة تقابلك في طريقه طالما هيوصلك للي نفسك تكونه. خلي اختيارك لتخصص تبدع فيه مش اللي الناس بتشكر فيه.
بلاش تقارن نفسك بحد علشان كل واحد ليه ظروفه وميوله وهواياته اللي بتخليه مختلف عن غيره، اختار اللي يريحك ويرضيك انت مش اللي معظم صحابك هيختاروه ، لأن ببساطة دا مستقبلك وحياتك المهنية فمتختارش حاجة تخليك تندم بعد كدا.
حط في بالك دراستك الجامعية وسيلة لتحقيق غاية وهدف ، لازم تتاكد انك اخترت اللي بتحبه ، ولو محتار ابدأ استرشد بحد من أهلك وقرايبك اللي بتثق في رأيه ، اسأل صحاب الخبرة من طلبة الجامعة واعرف اكتر عن كل مجال لحد ماترتاح لمجال منهم.
وفي الاخر اعرف ان الخير في اللي هيختاره ربنا ليك، وارضى بالنتيجة مهما كانت علشان انت عملت كل اللي عليك ، وحط بدائل احتياطي لكل الكليات اللي بتحب مجالها علشان تدخل الجامعه وانتي في كامل الرضا والاستعداد لبداية خطوة جديدة ، وربنا يوفق ويفرح الجميع.